Транспорт
19
Авг 2019
1115
“Ўзбекистон темир йўллари” АЖга 5 та замонавий электровоз келтирилади
“Ўзбекистон темир йўллари” АЖнинг локомотив парки жорий йил охирига қадар 3 та, 2020 йилнинг биринчи чорагида яна 2 та 3ЭС5К электровозлари билан тўлдирилади, деб хабар беради жамият матбуот хизмати.
“Ўзбекистон темир йўллари” АЖга инвеститсиявий лойиҳалар дастурига кўра, жорий йил бошида Россия давлатидан 2 дона 3ЭС5К русумли янги электровозлар келтирилган эди. Иш фаолияти давомида мазкур электровоз мутахассислар томонидан муваффақиятли синовдан ўтказилди. Шу боис асосан юк тортиш учун мўлжалланган локомотивдан яна 5 та олиб келиш бўйича шартнома имзоланган.
Маълумот учун: Замонавий юк электровози 1520 мм темир йўлларда юриш учун мўлжалланган бўлиб, 3 та секциядан иборат. Ҳар бир секцияда 4 та ғилдирак жуфтлиги ўрнатилган. Электровознинг тортиш кучи соатига 9840 кВт ташкил этган бўлса, Хитойдан келтирилган 1 та секцияли “Ўзбекистон” электровозининг тортиш кучи соатига 6000 кВт эди. Кўриниб турибдики, мазкур локомотив бошқаларга нисбатан жуда катта кучга эга. Шунингдек, бир соатлик минимал юриш тезлиги 49,9 км/с ни ташкил этади. Энг юқори юриш тезлиги 110 км/с. Электровоз қишнинг изғирин совуғида ҳам, ёзнинг жазирамасида ҳам юришга мўлжалланган. Локомотив кабинаси тўлиқ компьютерлаштирилган бўлиб, машинист учун барча қулайликлар яратилган.
Ўхшаш янгиликлар
