20 Ноябрь 2019

00:00:00 (GMT+5)

Тошкент +11,4 °C

Туризм
28 Окт  2019 705

Ўзбекистонда «Naqshbandi Tourism Festival 2019» халқаро тадбири бўлиб ўтади

Малайзиянинг «Умумжаҳон Сўфийлар ташкилоти» ташаббуси билан 31 октябрь – 7 ноябрь кунлари Ўзбекистонда зиёрат туризми йўналишида «Naqshbandi Tourism Festival 2019» номли халқаро тадбири ўтказилиши кутилмоқда, деб хабар қилади Туризмни ривожлантириш давлат қўмитаси.

Мазкур тадбир «Hilal Travel» сайёҳлик ташкилоти ҳамда Туризмни ривожлантириш давлат қўмитаси кўмагида, шунингдек, Дин ишлари бўйича қўмита, Ташқи ишлар вазирлиги, «Ўзбекистон ҳаво йўллари» ва «Ўзбекистон темир йўллари» ҳамкорлигида ташкил қилинмоқда. «Naqshbandi Tourism Festival 2019» халқаро фестивали доирасида 18 давлат, жумладан, Малайзия, Индонезия, Туркия, Ҳиндистон, Хитой, Буюк Британия, Янги Зеландия, Австралия, Бразилия ва АҚШ давлатларидан 200 га яқин меҳмонларнинг ташриф буюриши кўзда тутилган.

Зиёрат дастури доирасида меҳмонлар Тошкент шаҳрида кутиб олиниб, сўнгра Бухоро шаҳри томон йўл олишади. У ерда «Етти пир» номи билан машҳур бўлган ҳазрат Абдухолиқ Ғиждувоний, Хўжа Ориф Ревгарий, Хўжа Маҳмуд Анжир Фағнавий, Муҳаммад Баҳоуддин Нақшбандий, Хўжа Бобои Самосий, Хўжа Али Ромитаний, Абул Ҳафс Кабир ҳамда Саййид Амир Кулол каби улуғ зотларнинг зиёратгоҳларини зиёрат қилишади. Бундан ташқари, фестиваль дастурига кўра, меҳмонларнинг Мир Араб Олий мадрасасига ташрифи ҳамда унинг фаолияти билан яқиндан танишиши режалаштирилган. Шундан сўнг халқаро тадбир меҳмонлари Самарқанд шаҳрига йўл олишади. Темурийлар пойтахтида зиёратчилар ҳазрати Имом Бухорий мажмуаси, ҳазрат Хўжа Убайдуллоҳ Аҳрор хамда Шоҳи Зинда мажмуаларини зиёрат қилишади. Меҳмонлар шунингдек Қарши ва Термиз шаҳарларига ҳам ташриф буюриши кўзда тутилган бўлиб, у ерларда Абул Муин Насафий, имом Ат-Термизий, Ҳаким Термизий каби ислом оламининг машҳур алломалари мангу қўним топган муборак масканларни зиёрат қилишади. Ушбу зиёратлардан сўнг меҳмонлар Тошкентга йўл олиб, пойтахтда Ҳазрати Имом комплекси ва Ўзбекистон мусулмонлар идорасига ташриф буюришади. Шу билан бирга, Ўзбекистонда илк бор мусҳафи шариф чоп этилаётган «Ҳилол-нашр» матбаа-нашриёти фаолияти билан танишиш ҳамда Ўзбекистон Президенти ташаббуси билан бунёд этилган шайх Муҳаммад Содиқ Муҳаммад Юсуф номидаги масжид мажмуасига ташриф буюриш режалаштирилган.

Таъкидлаш лозимки, «Hilal Travel» сайёҳлик ташкилоти томонидан ташкиллаштирилаётган зиёрат туризми йўналишидаги ушбу халқаро тадбир Ўзбекистонда зиёрат туризмининг ривожи ва юртимизга халқаро зиёратчилар оқимининг янада кўпроқ жалб қилиниши йўлида хизмат қилади. 

 

Ўхшаш янгиликлар

Белгиланган матнни тинглаш учун қуйидаги тугмани босинг Powered by GSpeech